வழிகாட்டி

மனிதர்கள் அற்ற 
வளைவு நெளிவு சாலையில் 
நம் முதல் பயணம் 
குழப்பவே செய்யும் 
முச்சந்திகளும் நான்குசாலை 
முத்தசந்திப்புகளும் 
கேள்விகுறியில் நிரம்பி வழியும் 
புத்தி சக்தியற்று 
நிற்கும்போது சத்தமில்லாமல் 
எங்கிருந்தோ வரும் 
ஒரு மூதாட்டியோ 
வீடு திரும்பும் பள்ளி சிறுவனோ 
மிதிவண்டி வழிவரும் 
யாரோ ஒருவரோ 
வழி சொல்லி செல்வர் 
நமக்காகவே வந்த
வழிகாட்டிபோல
இந்த முகங்கள் சில 
நினைவில் தொலைய மறுக்கும் 
நான் வழிகாட்டிய 
சிலரேனும் என்றாவது 
என் முகம் நினைப்பரோ ???

குறுந்தகவல்

பின்னிரவு அமைதியை கலைத்தபடி 

நீண்ட இடைவெளிக்கு பிறகு

நீ அனுப்பிய குறுந்தகவல் 

பார்த்து என் கைபேசி 

என்னை சத்தமிட்டு அழைத்தது

பொழுதுகள் புரியாத கருவி

என்னை விட்டு
நீ பிரிவதை 

உன் ஆங்கிலம் 
சுருக்கமாய் சொன்னது
வருத்தப்பட நேரமே 
கொடுக்காமல் அடுத்து வந்த 
நண்பனின் நகைச்சுவை 
வாழ்க்கை வேகமாய் 
போவதை நம்மை விட 
நம் கைபேசிகள் புரிந்து கொண்டன  

மேகங்களின் இடையே

மேகங்களை கலைத்து
சந்தோஷபட்டது காற்று 
விருப்பமான கனவு 

கலைந்தது போல் பாரம் 

தொலைந்த பொம்மை 

தேடும் குழந்தையாய்

வானவீதியில் தேடி நடக்கிறேன்

வழியில் தட்டுபட்டது 

கலைந்த மேகங்களின் இடையே 

மிதந்து வந்த 

சில பறவை இறகுகளும்... 

முகத்தில் மோதிய 

சில மழைதுளிகளும்...

வருத்தமாய் திரும்பும் பொழுது

மேகங்கள் மீண்டும்

இணைய தொடங்கின 

ஓவியங்கள் பல உயிர் வந்து

ஓட தொடங்கின !

முகாமில் இருந்து....

சொந்த வீடு சுமந்து

செல்லும் நத்தையாய்

தினம் இடம் பெயர்கிறேன்

என் நிரந்தர பூமி

இன்னும் எவ்வளவு தூரம்?

 

என் உடைமைகள் தானே

என் உண்மையான பாரம்

 

தாய் நாட்டிலும்

அகதியாய் வாழ்வது

சொந்தவீட்டிலே சிறையல்லவா?

 

கைக்கெட்டும் தூரத்தில் உறவுகள்

கைகட்டி வேடிக்கை பார்க்க

அந்நிய கைகளாவது

கைக்குட்டையோடு

வருகின்றன

எம் கண்களில் வழிவது

உப்புக்கண்ணீர் அல்ல

உதிரம் என அறியாமல்

ஆனால்

பானன் யாழ் மீட்டி

பரிசாய் பெற்ற மண்

முழுதும் பாழாய் போகவில்லை

உதிரங்களை விதைத்திருக்கிறோம்

விருட்சங்களுக்காக காத்திருக்கிறோம்.....!

வேண்டுவன வேண்டும்!

மீண்டும் பிறந்திட வேண்டும்

இந்த பூமிப்படுக்கையிலே

தாழாட்டு பாடிடவே இதே

தமிழ்த்தாயின் மடியும் வேண்டும்

 

எளிதில் தமிழ்ப்பற்றிடவே  விரைவில்

எனக்கு பாரதி விளங்கவேண்டும்

சுற்றும் உலகினிலே தமிழ்ப்படை

சூழவலம் வர வேண்டும்

 

தமிழர்க்கு இழைத்திடும் கொடுமைகளை

வேரினில் கொய்ய வேண்டும்

வேதனையுற்ற மக்களுக்கு துயர்துடைத்து

சாய்ந்திட தோள்தர வேண்டும்

 

வேல்தனை கொண்டு இனிபூசைகளில்லை

தமிழா நம்சோதனை தீர்ந்திடவே

முன்ணேற்ற பாதையில் குறுக்கிடும்

விஷஜந்துக்கள் கொல்ல வேண்டும்

 

வீட்டுக்குவீடு காவியம் பாடிட

இளங்கவிகள் கோடி வேண்டும்

இனி “இல்லை” என்ற சொல்லே

தமிழகாராதியில் இல்லாது போகவேண்டும்